PORTOMARÍN, VELLO CAMIÑO

O Miño deu lugar ó nacemento do primeiro Portomarín. Por aquí cruzábase o grande río. E as dúas ribeiras coñeceron a xente apegada ó río e ás súas augas, que tiñan na súa ponte algo máis ca un simple instrumento para pasar dunha a outra beira. Era a súa razón de ser. E desde hai mil anos, a vila aparece mencionada, en tódolos itinerarios a Compostela, como PONS MINEI, PORTO MARINO, PONTE MARINE, PONTEM MARINUM ou PORTO MARIN. Con “PORTOMARÍN, VELLO CAMIÑO” intentamos coñecer mellor esta terra, descubrila para aqueles que non a coñecen, e mesmo para os que crendo saber da súa historia, das súas pedras e da súa xente, poden – a través da imaxe e o son- observar mellor este Portomarín, vello camiño, sabia xente, que acolle ó visitante con afecto de séculos.